Psa 148 | JAE | STEP | Aleluja. Alanem Apômtau aŋga undambê. Alanem eŋ aŋga lôlôc.

Psalms 148

PESALEM 148

Undambê to nom sêlanem Apomtau

1 Aleluja.

Alanem Apômtau aŋga undambê.
Alanem eŋ aŋga lôlôc.
2 Ênê aŋela samob, alanem eŋ.
Ênê lau totoŋ-totoŋ samob, alanem eŋ.

3 Oc to ajôŋ, alanem eŋ.
Amac utitalata samob, alanem eŋ.
4 Amac undambê to undambê, alanem eŋ.
Amac bu, taŋ apoac umboŋ ŋaô naŋ, alanem eŋ.

5 Gêŋ samob tonaŋ ŋai, alanem Apômtaunê ŋaêmaŋ
gebe eŋ kêjatu, tec gêŋ tau ŋanô kêsa.
6 Gebe eŋ ketoc gêŋ tonaŋ ŋai kêkô gebe êkô endeŋ tôŋgeŋ
ma kêkêŋ ŋagôliŋ, taŋ sêŋgêli atom naŋ, gêdêŋ êsêac.

7 Amac gêŋ nomŋa, amac gêŋsêga gwêcŋa to gwêc ŋagêdimlabuŋa samob naŋ,
alanem Apômtau.
8 Aôm ja to kompoc, aôm sno to ômbiŋ,
aôm mutêna, taŋ gôgôm ênê biŋ kêtu tôŋ naŋ, amboac tonaŋgeŋ.

9 Amac lôc to gamêŋ ŋabau samob,
amac gêŋkaiŋ to nip walaŋ samob,
10 amac bôc saleŋŋa ma malacŋa samob,
amac gêŋ kêkêŋŋa ma moc tomagê, alanem Apômtau.

11 Amac kiŋ aŋga nom to tenteŋlatu samob,
amac kasêga to gôliŋwaga nomŋa samob,
12 amac ŋacsêŋom to awêtakiŋ,
amac lau ŋanô to ŋapalê, alanem Apômtau.

13 Lau samob tonaŋ ŋai sêlanem Apômtaunê ŋaêmaŋ
gebe ênê ŋaê tageŋ tec ŋaê towae. Ênê ŋawasi kêlêlêc undambê to nomgeŋ.

14 Eŋ kêkêŋ ŋaclai gêdêŋ nê lau gebe ênê lau mansaŋ samob sêlanem eŋ
sêwiŋ lau Israel, taŋ têtu ênê gêŋ naŋ.

Aleluja.